ΑΓΟΡΑ

Denique pelliculam Agoran spectavi ; annum totum exspectaveram ! vere postero ante ferias Cannes primum de ea nuntium audiveram. Verebar ne invectionis causa religiosae theatra brittanica pelliculam respuerent. Feliciter tandem Londinium advenit.

Re vera, talis pellicula magno in scrinio spectanda est. Urbs Alexandria antiqua reapse vivescit : hieroglyphica colorata in muris obeliscisque, viae pulverulentae, aedes magnificae et neglegentia et tempore dilabentes, vulgus omnium gentium, &c. Scilicet erant passim anachronismi et discrepantia historiae, sed nulla ex his peliculam laederunt nec opprobrium magnum elicuerunt.

Hypatia illa est mihi dilectissima ex philosophis naturalibus antiquitatis, immo omnium saeclorum. Lugeo illam necatam esse, ploro opera illius perdita. Talis magistra, talis philosopha, talis cogitatrix mihi animum inspirat.

Hem, digredior, sed haud sum criticus. Desino de pellicula scribere. Solum te hortor ut spectes.