fabula in nave

Mel fabulam cum amica spectare constituerat, sed amica aegrotans non potuit, ut mihi tesseram daret. In popinella vegetariana, Heaven Canal Café nomine, convenimus, loco amoeno et tranquillo, quo e fenestris fluvium despectare possemus. Numquam vesperi locum in vicinia Camden tam inanem vidi ; pro certo reveniemus, si eventa nos iterum ad Camden duxerint.

Fabula in nave agebatur. Navis non erat in portu, sed alicubi in ripa ligata'st, ut die fabulae acturae itinerarium spectatoribus per epistolam electronicam missum sit. Pontes igitur transiimus pontibusque subiimus navem petendum. Amoenitas fluminis verpertina nos valde percussit, attamen luce debili photomachina (sc. telephoni mobilis) haud multa capere potuit -- nisi post fabulam caeruleis in lampadibus sub ponte. Olim fortasse cum tripode photomachinam meliorem adferam. Usque eo memoria sufficiat.

Fabula ipsa, In memory of Leaves titulo, scripsit et agebat Natasha Langridge. Fabula est quasi oratio, et saepe velut carmen numerosa. Historiam texebat sua de vita recenti, de amoribus, de itineribus, de reclamationibus in rem publicam et in amatores. Scaena erat tota navis caverna, spectatores utrimque in subselliis sedebant, dum inter nos mima movebatur sicut saltatrix, loquebatur sicut oratrix, et fatebatur res gestas sine mendacio, sine mora, sine metu.