![[personal profile]](https://www.dreamwidth.org/img/silk/identity/user.png){kind=small}
Glocestriam mane die Saturni ferrovia vecti sumus ut nuptiis Bethaniae (sororis iunioris Mellis) adessemus. Pluebat, ut solet, dum e Londinio discedebamus, sed Sol postea tellurem inluminabat -- Deus fortasse fidelibus hoc praemium dedit, quoniam in ecclesia sua eos iungeret.
Primum Glocestriae in ferroviae loco patrueles Oliver et Louis nobis obviam ierunt. Tandem Alice (soror minima natu) advenit nos omnes elatum. Chartam cum oppidi tabula habebamus, in qua situs tabernae optimae, ecclesiae et loci Chris (maritus futurus) denotaverat. Itaque autoraeda in via Spread Eagle Road (hahae) nomine relicta per forum tabernam petiimus. Solum singulas cerevisias bibimus ne dedecore inter nuptias nos gereremus. Sat difficile erat risus continere, et nemo verumtamen volebat iocos quosdam emittere ; parentes mariti ignoscunt filium suum vestimenta feminea gestitare. Verebamur ne quis hoc patefaceret -- immo sperebamus alium patefacturum. Sed diei nocere nolens tacebamus.
Ecclesia S Catherinae est vetus aedificium lapideum, maior et pulchrior quam exspectavimus. Ardebat Sol per finestras. Sero advenimus, sed serius coeperunt. Nisi Mel et Alice, familiae admoderate vestitae sunt ; et patrueles sytheses gerebant. Multi autem aderant gothici, qui videbantur sese ad tabernam nocturnam paravisse. Et vicaria erat gothica, sed ecclesiastico in vestimento. Vere vicarios gothicos esse -- et vicarias praecipue-- valde nobis placet, etsi non sumus religiosi. Haec erat amica coniugum vetus, quae nos novit, quae olim et Mellem enim et Alicem in convivio Whitbyensi lasciviter mulserat. Nos igitur apud aram ridentes susurrantesque non invidebat.
vicaria Skye cum filia, Bethany, Chris
Caerimonia ipsa erat magnopere sollemnis ; precibus, hymnis, orationibus, lectione e bibliis sacris, sescenties invocationibus Trinitatis consistebat. Nemo e manu nostra oravit, Alice sola cantavit. Postea Alice dixit se, quod non credit, orare in ecclesia nefas putavisse. (Quonam, inquimus per iocum, fas sit ?) vicaria sermones saepe ad amicos accomodabat. Iocose passim, ne parum quidem proterviter, loquebatur. Ridebat dum organista male canebat. Bethaniam agnomine Tink nuncupabat (haud rite ! inquit Alice. Noli Sollicitari, inquam, Deus agnoscit quis sit.) Lectio erat ex epistula Pauli ad Colossenses (3:12-17), qui mihi haud nuptiis idoneus videtur. Paul quidem nuptias despicit, porro hi versus non amorem sed etiam caritatem tractant, etsi anglice agapê love redditur (atque versus sequens viro feminam subdat, phy !).
Classy!
Три сeстры
Tewkesbury postea quadam in exedra agebatur convivium nuptiale. In principio languescebamus, sed pauca post pocula gaudebamus. Musica pro certo adiuvabat, etsi non semper placebat (videlicet gothici londinienses aliter quam glosterenses musicam amant). Chris carmina sibi elegerat : Dude looks like a lady et Lola praecipue ! Nimis vinum coniacum potavi, cui photographas infras culpo :
Quid, inquit puellula, cum pepone facite ?
Post convivium (hora vi noctis) Alice, Mel, pater earum, Oliver et ego tabernam petiit. Sed omnis Tewkesbury clausus est ! In via prope deversorium townies quidam grandaevi e YMCA discedentes nobis obviam ierunt, et ad tabernam nocturnam Riverside nomine nos adverterunt. Oimoi ! quam horrorem ! Vix dimidiam horae partem inibi mansimus. Dum exibamus, vidimus ebriosam stridentem custodes oppugnare. Itaque apud flumen in tranquillitate erravimus.
