(no subject)

[beluosus]

Die Solis ullo sine diei consilio mane experrecti sumus. Lentule in atrio cum caffea resipuimus, dein ientaculum in popinella petiimus. In rete (per telephonum mobile) exhibitiones Londinii recentes perspeximus, ut denique decerneremus ad Museum Philosophiae Naturalis ire. Exhibitio inibi de Magno Hadronum Collidore apud CERN agitur. Heu, parum theoremata exponit. Nonnulla de collidoris actione explicit, sed plerumque de vita physicarum physicorumque et machinatorum machinatricumque historiolas narrat. Primum conventiculum clausa in exedra simulat, quo duo physici summatim experimenta et instrumenta enodunt, dein physica inventum particullae Higgsensis nuntiat. Simulatio non valet, quippe saepius e conventiculo erraret, atque ad passiones saepius attineret, nec ad physica. Voluimus discere, non passim fingere nos adesse. Neque in libraria musei libros invenimus qui theoremata ipsa tractant ; malunt scriptores investigationem vulgare. Nimis autem queror. Museum est gaudium, et aliis maxima cum laetitia fruebamur.