beluosus | (no subject)

Die Veneris denique ad Dead & Buried revenimus. Quam longe mihi videtur nos afuisse... hem, paene veritus sum ne abnoctando desuevissem. Vanus feliciter pavor. Haud sero advenimus ;vacua paene erat taberna. Alius ianitor adest, ut non amico cum nostro horam solitam garrire possemus. Emptis poculis mensam prope ianuam adepti sumus. Mox Madeleine nobiscum se iunxit, post paulo et Psyche novo cum puero suo (cui nominis oblitus sum). Is quam benigne Psychei placentam nataliciam coxerat, quam ad tabernam tulit. Madeleine mihi locuta'st de scriptione ad diurnalia academica et de societate Gulielmi Morris. Tali studio invideo... sive me pudet ignavitiae propriae. Semper dico me ardentius laboraturum. An mihimet mentior ? Cum amicae e taberna discessissent ad sigaretam scelestam partiendum, ad solum saltationis cuccurimus. Postea Jeff & Liana nos invenimus. Doctissimae enim amicae valde volebam loqui, quippe tractatu de magia graeca perlecto in mente statim coaluit notio, de qua opinionem illius petere debebam. Nos oportet alibi colloqui, quo non debemus clamare.

Die Saturni amicum curavimus, qui ab uxore seiunctus't.